Bonaire | Partido Demokrat

Demokrat kier mira un Boneiru HUSTU I DURADERO, ku e Boneriano liber i orguyoso di su identidat trahando den harmonia pa un mihó porvenir.

“KI PROBECHO UN HENDE TIN DI GANA MUNDU, PERO PÈRDÈ SU ALMA?”

- MATEO 16:26

GOBERNASHON I SERVISIO

Gobièrnu transparente ku tur desishon, maneho i lista di espera di Gobièrnu públiko i aksesibel online, p.e. lista di espera pa tereno, kambio den destinashon di tereno i permit di konstrukshon;
Un Konseho Insular efisiente, kapas i krítiko ku ta sirbi interes di Pueblo i no partido, i ku ta sigui desaroyá i eduká su mes permanente;
Stipulá un término di seis siman ku un siudadano ta risibí kontesta riba su petishon pa permit of servisio;
Trese servisio di Gobièrnu serka di pueblo dor di instalá sentro di servisio den bario kaminda por pidi i risibí tur servisio di Gobièrnu;
Stimulá partisipashon struktural di pueblo i hóben den Gobernashon;
Re-strukturá aparato di Gobièrnu i di otro organisashon ku ta ehekutá tarea di Gobièrnu segun prinsipionan di transparensia, bon gobernashon i responsabilisashon;
Introdusí un ekipo ku ta desaroyá planifikashon stratégiko mas largu i koordiná diferente akshon i legislashon den e kuadro ei;
Mehorá nos presensia permanente tantu den region komo na Den Haag i Brussel.

Desaroyo ekonómiko struktura den balansa ku nos kultura i medio ambiente;
Hasi nos kultura i herensia un parti integral di nos ekonomia i turismo. Hasi músika i ekspreshon artístiko un parti fundamental di nos formashon i desaroyo ekonómiko;
Enfoká i invertí den mikro turismo pa nos mes hendenan por risibí i benefisiá di nos produkto turístiko;
Mantenshon struktural di nos infrastruktura, inkluso maneho di áwaseru, na un manera transparente i planifiká;
Stimulá agrikultura pa nos por produsí gran parti di nos propio kuminda i baha gastu;
Introdusí un supsidio pa instalá energia solar na kada kas;
Introdusí transporte públiko konfiabel i pagabel.

Apliká mínimo sosial real den tur maneho di Gobièrnu i enfoká ku tur siudadano por retené 30% di su entrada despues di a paga tur su gastunan;
Baha gastu di tur bibienda na un tarifa pagabel, no solamente esnan di FCB. Konstruí bibienda pagabel pa kumpra of hür den barionan eksistente i no solamente sakrifiká naturalesa pa konstrukshon nobo;
Introdusí un sosten finansiero pa kada famia ku yu, pa yuda den nan gastunan;
Krea barionan mas agradabel, kaminda por rekreá na un manera sano i seif;
Duna preferensia na nos yunan di tera i esnan ku un laso sosial ku Boneiru;
Krea maneho struktural pa stimulashon di deporte re-kreativo, kompetitivo i na nivel profeshonal;
Introdusí sosten sosial i finansiero adishonal pa nos grandinan;
Introdusí maneho pa kuido di bestia na un manera responsabel i humano.